कर्णाली प्रदेशको  मुगु जिल्लाका युवाहरूले दुर्गम क्षेत्रमा अझै प्रभावकारी इन्टरनेट तथा मोबाइल सेवा नपुगेको भन्दै सूचना तथा सञ्चार प्रविधि मन्त्री विक्रम तिमल्सिनाको ध्यानाकर्षण गराएका छन्।

सरकारको १०० बुँदे शासकीय सुधार कार्यसूचीमा समेत उक्त विषय समावेश नभएको भन्दै युवाहरूले सञ्चारमन्त्रीमार्फत  बुधबार सरकारको ध्यानाकर्षण गराएका हुन्।

आशिष देवकोटाको नेतृत्वमा गएको मुगाली युवा टोलीले सञ्चारमन्त्री तिमल्सिनासँग भेट गरी जिल्लाको वास्तविक अवस्था, भौगोलिक चुनौती र समाधानका उपायसहित सुझाव प्रस्तुत गरेको जनाएको छ।

टोलीले प्रस्तुत गरेको तथ्यांकअनुसार मुगु जिल्लामा रहेका २४ वटा टेलिकम टावरमध्ये केवल १२ वटामा मात्र फोरजी सेवा सञ्चालनमा रहेको छ भने बाँकी क्षेत्रमा अझै टुजी वा कमजोर नेटवर्कमै सेवा सीमित छ।

करिब ६४ हजारभन्दा बढी जनसंख्या रहेको जिल्लामा इन्टरनेट प्रयोगकर्ता संख्या अत्यन्त न्यून रहेको र धेरै नागरिक अझै डिजिटल सेवाबाट वञ्चित रहेको युवाहरूले बताएका छन्।

युवाहरूले दुर्गम जिल्लामा सञ्चार पहुँच विस्तारका लागि आवश्यक पूर्वाधार विकास, सेवा स्तरोन्नति तथा सरकारी प्राथमिकतामा यो विषय समावेश गर्न सरकारसँग माग गरेका छन्।